Кун бўйи бир ўзи уйда ўйнаб зериккан икки ёшли қизим ишдан келишим билан оёғимга осилади. “Опане, опане”, дейди. Бу “мени кўтаринг”, дегани. Қанчалик чарчаган бўлмай, кун бўйи дадасини кутган қизимни кўтариб, ўйнатишдан чарчамайман. Гоҳида соат ўн икки бўлиб кетади. Охири қўлимда кўзчаларини уйқу элитади. Бу пайтда эса ўзим ҳам уйқудан ўзимни аранг ушлаб турган бўламан.

Ошхонада идишларнинг тарақ-туруқи эшитилади. Қизим кўзларини очади. Онасининг эҳтиётсизлигидан жаҳлим қайнайди. Яхшилаб танбеҳ бергим келади…

Яна қизимни аллалашга тушаман. Тезроқ ухласаю ёстиқни қучоқлаб, уйқу денгизига чўкиб кетсам…

Шу пайт ташқарида машинанинг сигнализацияси чалинади. Қизим яна безовталанади. Мен тишларимни ғичирлатиб, машина эгасини ичимда бўралаб сўккан бўламан. Бориб, деразани зичлаб ёпаман. Шовқин тингач, қизим яна уйқуга кетади…

“Тиқ” этган товуш эшитилмаслигига тиришаман…

Ниҳоят қизим бир маромда нафас олиб, уйқуга кетади…

Мен буни шунчаки бекорчиликдан ёзмадим. Ана шундай кунларнинг бирида, уйқум ўчган кезларда ўйлаб қолдим: бир пайтлар суриялик, ироқлик ва бошқа жаҳаннам ўчоғига айлантирилган мамлакатлардаги Оталарнинг ҳам шундай ширин ташвиши бўлган. Улар ҳам аёлининг турли арзимас шовқинлари фарзандлари уйқусини ўчирганда ёхуд машинанинг овозидан ғазабланган…

Бугун-чи? Жажжиларининг қулоқлари шовқинларга, беғубор кўзлари қип-қизил қонга ўрганди. Энди у оталар биз каби шунчаки деразани ёпиш билан ташқаридаги шовқин-суронни тиндиролмайди…

Интернету телевизорда кўрган тасвирлар кўз олдимдан ўта бошлайди: боласининг бомбадан сочилиб кетган танасини қучоқлаб, фарёд чекаётган, ҳеч нарса қўлидан келмаётган ғариб Оталар… Денгизга ғарқ бўлган боласини қутқариб қолишга ҳоли келмаган ғамнок, ғазабнок, аламзада Оталар… Тинч жой излаб, ота-бобоси минг йиллардан буён яшаб келган қадрдон юртини ташлаб, болаларини елкасига кўтариб бораётган жўмард Оталар… Қорни овқатга, кўзи уйқуга, қалби ҳаловатга тўймаган жафокаш Оталар…

* * *

— Дадаси, ҳалиги…

— Жи-м-м, қизим ухлаяпти!

 

Муслим Мирзажонов, блогер

Дўстларга тавсия этиш
2017 йил 28 декабрда эълон қилинган  92 марта кўрилган